|
الكاتب Mohamed Elhamayel
|
|
الأحد, 07 فبراير 2010 14:01 |
.jpg) على صفحة جدار الكون
تاريخ منقوش
ومن كل الحجاره فنون
رسمنا وشوش
حفرنا الحرف بايدينا
بازميرنا وكل شاكوش
وزينا الحجر بنقوش
ومن عبق التاريخ يا زمان
معابد عاليه شيدنا
واهرام تلقى مقياسها
بعقل الهندسه اتخطت
بعلم عقول
وكان الكون فى جهل ولسه
ما تعلمشى الا النوم
بنينا بالعلوم دنيا
بعلم ونور سلام بيدوم
تعالى احكى لى يا عم
التاريخ واروى
لولدى وقول
وخدهم رحلة فى الوادى
وطوفهم فى كل ربوع
يشوفوا ويقروا بعيونهم
ما كان محفور
وكان مدفون
اثار الدنيا تلتينها
دى ملك لمصر
وكل الكون له تلت مشاركه
اصل احنا حضارة كون
سبقنا الدنيا بعلومنا
وادنا الشمعه بايدينا
فى ضلام الكون
تاريخ يا كبيره وكتابك
ده بهو تشيله عمدانك
حروفة قصاد عيون الناس
بيقروه وهما جوه الدور
وما وقفناش
ولا قطر العلوم عطلان
تاريخك لسه عم يكتب
وكمل دور جدودنا بدور
نوابغ مصر فى عقولنا
وفى عقولهم معالم نور
ما نضبت مصر برجالها
بتولد مصر يوم ورا يوم
زعامات غيرت دنيا
وضافت للتاريخ صفحه
وشق صفوفنا من علما
فى كل مجال
رجال بصمتها بتعلم
تضيف للكون
وهتكلم انا المصرى
ما عاد يابنى السكات ينفع
ما عاد دمى اللى راح يشفع
وفات لينا الجراح بالكوم
انا مصر التاريخ يابنى
كفاح موصول
وبانيه الكل من دمى
ودمى فى ارضهم طارح
لخيرهم كل شىء لليوم
ما فيش غيرك فى يوم يابنى
ده من دمى
ما ليش غيرك عزيز عندى
ومن لحمى
تعالى فى حضنى كملنى
وداوى بدمعتك جرحى
وخد منى اللى ليك موجود
ودانك بس تسمعنى
ما تسمعش اللى سممنى
وهد بايده جدرانى
انا مصر التاريخ جدك وابوك سدى
وخالك ويا اعمامك
جنود لحدودى بتصونها
وامك يا بنى بكريه
لبنات اليوم
تلاقى الاصل فى جدورها
اصيل ممدود
وشوف واقرا التاريخ واعرف
ده حقك يابنى تفهمنى وتعرفنى
ده حقك اوعى يوم تسمع
تاريخ من زور
وعيش فى الدنيا متسيد رافع راسك
لا مال فى ايدين خسيس
رح يبقى لى السيد
ما دام انت يا ابنى فى حضنى
متسيد عليك الدور
انا يا بنى التاريخ ارضى
ورجلك فوق تراب عرضى
تمد الخطوه تلقاها
بتتخضر سنابل شوق
تقول مصرى
حفيد عملاق حضارة الكون
 |
|
آخر تحديث: الاثنين, 08 فبراير 2010 16:26 |
